中環出更：樂於解惑 助青年圓創業夢
香港好多年輕人都希望一嘗創業夢，但創業路並唔容易，好多創業者開始後先陸續發現遇上困難同需要支援，一班年輕創業者早前就成立咗一個叫香港青年創業政策關注組嘅組織，主席陳家樂話除咗為業界發聲外，亦會擔當一個修補角色，針對政府政策提供相關建議，令其更切合持份者需要，改善創業氛圍，等創業者行少啲冤枉路。
陳家樂話創業唔單止係商業趨勢，更加係社會嘅新動力，雖然政府經常話支持年輕人創業，但政策制訂或立法未必真正切合行業持份者嘅需要，以科技券計劃為例，原來做手機App嘅就唔屬於範圍內，認為有可以優化嘅地方。
社企難關 須自負盈虧一年
關注組成員陳鳳儀本身係香港社企協會創辦人，佢話好多年輕人喺創業時都會選擇以社企為出發點，但對社企實質定義或營運模式唔夠清楚。佢舉例稱，深水埗明哥（陳灼明）派飯都係一種商業模式嘅轉變，係社企嘅一種，但社企好多時遇到嘅問題就係必須自負盈虧一年後，先可以參與政府的伙伴倡自強計劃提供嘅種子基金，希望組織可以為遇到疑惑嘅創業者提供一啲意見。
青年創業軍主席溫學文都在場，講起創業經歷，佢話自己現時有經營網上平台供消費者評價唔同行業嘅服務，好似食評咁，但就換成髮型師、司儀等其他範疇，亦發現一啲問題好似出現打手等，需要針對問題逐一解決。
同場仲有外務副主席周世傑、麥兆雄、歐陽鳳盈、黃淑玲及內務副主席鄧俊康等。家族經營藥業的麥兆雄稱，政府推廣中藥但喺GMP制度下業界動輒須投放過千萬元出新藥，認為好多時有規管但冇方向。
卓妮