中環出更：同囝囝食飯 梁君彥要搵秘書約時間
好多立法會議員上任後都已經忙到冇時間陪屋企人，做埋主席就更忙。做咗立法會主席都三個幾月嘅工業界（第一）議員梁君彥仲誇張，忙到連同身為香港菁英會榮譽主席嘅囝囝梁宏正（Clarence）食飯都要搵秘書約時間。
Clarence早前出席經民聯嘅盆菜宴時透露，雖然同爸爸同一屋簷下，但係兩父子平日都冇乜機會見面，甚至連大家嘅行蹤都唔知。被問到會唔會擔心爸爸，佢就話仔女唔喺屋企，為人父母就會擔心仔女，但掉番轉父母唔喺屋企，就會冇人管住仔女。
宏正為爸爸着想 多注意言行
佢仲話自從爸爸做咗立法會主席之後，自己都要適應下。佢透露，爸爸依家做咗主席，相比以前係功能界別議員時，認識爸爸嘅人自然多咗好多，又話以前自己都會注意下啲言行舉止，但自爸爸做主席後，就再多加小心，以免影響爸爸。喺冇爸爸管住嘅情況下，Clarence都咁生性，仲會為佢着想，相信梁君彥都會感到安慰，唔使點擔心囝囝啦！
卓妮