政情：威脅不再 朱凱廸被搣保護貼
四個月前聲稱受到死亡威嚇而接受警方貼身保護嘅立法會議員朱凱廸，由於「一條毛都冇少過」，亦無再聽聞佢、家人或助理再遇上任何威嚇，據悉最近警方已經解除了對佢提供嘅保護，之前如影隨形嘅便衣探員亦已悄悄消失。
自稱係「官商鄉黑勾結」受害者
保育兼社運人士朱凱廸在去年九月當選立法會議員後，聲稱自己及其競選團隊受到死亡威嚇，令佢連屋企都唔敢返，一度提出要與家人搬到立法會大樓居住。由於佢係今屆立法會選舉嘅直選票王，又自言係「官商鄉黑勾結」嘅受害者，政府及警方事後亦都大為緊張，仲出動大批探員為佢及其家人提供人身保護，並且一度拘捕多人，懷疑佢哋有份跟蹤及威嚇朱凱廸。
據了解，警方為聲稱受威嚇人士提供人身保護，一般都設有限期，限期過後會作出檢討，如認為威嚇已唔存在，就會解除相關保護措施。