前排末代港督肥彭回魂返港指點江山，搞到嗰班戀英慕殖嘅獨派分子興奮莫名，點知肥彭前腳啱啱走，英軍後腳又到，莫非「事頭婆」諗住「班師回朝」？
睇真啲，原來今次係英軍人員應本港警方邀請，指導香港警察儀仗隊啫。聽講訓練由本月初開始，為期兩星期，訓練範圍包括步操等。其實睇過香港警方儀仗隊表演嘅都知，嗰種揦手唔成勢，嗰種姐手姐腳法，簡直笑大人個口，要加強訓練嘅點止英式步操同蘇格蘭風笛咁簡單？既然畀咗錢，唔爭在叫埋英國佬教埋升五星旗同奏《義勇軍進行曲》喇笨！
講真，家陣風頭火勢，港獨議題炒到（聲火）合合，加上正值回歸二十周年前夕，警方遲唔請早唔請，偏偏喺呢個敏感時刻禮聘舊主子返嚟執教，你話係咪老鬼土吖，你話阿爺會點諗吖？正如學者話齋，回歸十九年以來，公眾、政府以至中央都冇對警方儀仗及步操有咩批評，西諺有云︰啲嘢冇爛就唔好亂咁修理，香港警方冇嗰樣整嗰樣，結果咪辣着火頭，揦屎上身，唔衰攞嚟衰囉！
講開又講，戀英慕殖並唔係港獨小學雞嘅專利，警隊中亦大有人在。佔領期間嗰位戴錯皇冠警徽嘅女高級督察，冇孭鑊不特止，仕途仲更上一層樓；大家出街不妨留意吓，周不時仲會發現有警方告示雞乸咁大隻寫住「RHKP」，可想而知有啲人對「皇家」頭銜幾咁戀戀不捨，唔怪得近年不時傳出有警署「革扯」關帝像，可能有人想掛番事頭婆畫像都未定。
講番今次警方請英國佬教儀仗隊，查實如果真係想練好步操，咁近城隍廟點解唔求番支好籤？解放軍儀仗隊戰士每年練操閒閒地行爛十雙八雙皮鞋，服役期間踢出嘅正步，足足等於一次二萬五千里長征，香港警方儀仗隊學到一成咁專業，就唔使畀人笑到面都黃喇。
不過又難怪警隊緬懷故主嘅，上世紀六、七十年代，警隊貪污腐敗成風，部分人包娼庇賭，搞到臭名昭著，後來港督麥理浩成立廉政公署，大力整頓下警隊形象脫胎換骨，甚至一度躋身「世界一流警隊」之列。可惜吖，同一個警隊，英國佬管得有聲有色，自己人接手即刻一塌糊塗，特別係近年，醜聞更加厚過電話簿。非禮下屬、性侵市民、監守自盜、屈打成招……沒有最離譜，只有更離譜。鄧伯伯話英國人做得到嘅，中國人都做得到，事實證明啱啱相反，真係唔到你唔信邪。
當年滿清政府洋務運動失敗，證明「師夷長技以制夷」，只學西方皮毛無濟於事。香港警隊與其請英軍教儀仗隊，不如索性請英國佬返嚟做處長，教導吓咩叫「專業高效」、「廉潔奉公」都好吖。