政情：林智遠重遊度蜜月城市
度蜜月幾乎係剛結婚夫婦嘅指定動作，市建局非執行董事林智遠（Nelson）及太太都唔例外。佢哋十年前到過意大利威尼斯等地度蜜月，最近Nelson同太太再踏足呢個城市，今次以充裕時間重臨舊地，登上當地教堂鐘樓，回望聖馬可廣場，尋找更多未去過嘅全新地方。
Nelson同太太其後到英國倫敦、蘇格蘭愛丁堡等地，Nelson於facebook上載照片，指期間預留咗一整日於參觀大英博物館，目的係尋求知識增長。Nelson話，以前留學都參觀過好幾次大英博物館，「其實睇多幾次都冇辦法睇完」，佢其後又自爆，早前去過埃及，今次跑嚟大英博物館，主因係要睇用嚟解開埃及文字秘密嘅羅塞塔石碑（Rosetta Stone）。
不過，是次行程最令Nelson意外，或者係原來倫敦地鐵等交通工具於聖誕節正日停駛，有網民笑稱，如果以上嘅情況於香港發生，隨時出現暴動都似喎！