政情：楊岳橋銀彈撬人 黨內外狂轟
立法會選舉一向依賴地區樁腳，其中區議員扮演好重要嘅樁腳角色，事關佢哋喺地區深耕，同支持者打好關係，可令政黨喺選舉時有更大優勢。偏偏公民黨（公文袋）喺呢方面「先天不足」，次次派人出戰區議會都鎩羽而歸，其中新界東嘅情況最為慘淡。聽聞身兼公文袋黨魁嘅新界東立法會議員楊岳橋圖謀走捷徑，最近連番出動銀彈攻勢，打算撬走其他泛民黨派嘅區議員，可惜肯過檔嘅都被指係「籮底橙」，結果因黨內反對而作罷。
一直以嚟，公文袋都係以政治明星招徠，向來被批評離地，因為該黨嘅區議員相對較少，地區工作自然做得唔夠紮實。其中新界東係重災區，今屆區議會選舉喺該區更加輸到貼地，一個區議員都無。
泛民中人直斥過火
政壇一直盛傳公文袋求才若渴，積極搵唔同區議員加入。聽聞楊岳橋最近頻頻出手，以銀彈攻勢吸引新人，包括免去區議員向該黨上繳薪金嘅規定，又承諾會分配更多資源支援地區工作，據悉唔少沙田同將軍澳嘅區議員都為之心動。
不過，楊岳橋此舉引起唔少泛民政黨中人鬧爆，直斥做法好「過火」，就好似喺同一塊餅搶食，只會破壞民主派團結，更明言咁做違背政治倫理。
泛民中人仲話，楊岳橋喺今屆立法會選舉時，拉攏其他泛民政黨嘅區議員幫佢拉票，已經講唔過去，今次索性玩挖角，好唔應該囉！
心動區議員多負評
不過，銀彈攻勢似乎無咩用，公文袋中人透露，部分被銀彈攻勢打動嘅區議員負面評價多，例如有啲想轉黨區議員同原來所屬政黨有錢銀糾紛，有啲人就同其他民主派反面，總之一個二個似足「籮底橙」。
咁講法，即係楊岳橋銀彈撬人最終都只係得個吉，失敗收場。不過，講開又講，公文袋最近確係有由其他政黨過檔嘅新黨員，就係先後退出民主黨、新民主同盟嘅沙田區議員容溟舟，但係就唔關今次銀彈招兵事喇。