中環出更：陳沛然返醫院 跑快過搭車
有部分立法會議員唔係全職，尤其係功能組別嘅議員，所以成日要喺立法會同工作地點兩邊走。醫學界立法會議員陳沛然（Pierre）本身喺灣仔律敦治醫院擔任內科副顧問醫生，前兩日佢趁假期唔使返立法會開會，分別用唔同方法來回立法會同醫院，試下邊種方法最快。可能本身踢開波，體能較好，結果佢發現着住皮鞋跑仲快過搭車，只需要九分半鐘！
自己做「白老鼠」實驗
Pierre將測試結果放上社交網站，笑稱自己鍾意做實驗、收集數據。除咗跑步，佢仲試過揸車、搭港鐵、電車、行路同埋問囡囡借滑板車嚟踩。交通工具之中，最快係踩滑板車，只需十七分半鐘。之後就係搭港鐵，要十九分鐘，不過就要上上落落。而自己揸車就最耐，要廿五分鐘，因為成日塞車。
Pierre原本仲想試埋踩單車，但由於必經嘅皇后大道東多車及燈位，所以太太唔准。不過唔怕喇，Pierre都搵出最快方法，日後如果冇時間踢波，都可以靠跑返立法會維持運動量。
卓妮
_