國泰航空喺官網度聲稱致力令旅客旅程將變得更難忘，講得一啲都冇錯，事關佢哋甩漏多多，烏龍百出，唔係delay就係上演九霄驚魂，旅客次次有得震冇得瞓，甚至淪為機場難民，真係唔慌唔難忘咯！
好似有位仁兄咁吖，一行三人上周五離港前往北海道玩，當日因為風雪滯留大阪關西機場廿四小時，結果花費四千蚊住酒店，更排足十二個鐘候補機位，原本以為順利抵埗已經好好彩喇，點知原來只係噩夢嘅開始。佢哋原定乘坐尋晚班機返港，點知聖誕日至失驚無神獲國泰告知航機被取消，最快要到出年一月十二號先至有直航機位返港。
大佬呀，無喇喇留多半個月，係咪國泰包食包住先？最緊要嘅係，事主今日就要返工，半個月後至蒲頭，怕且一早畀老闆請食無情雞，呢條數又邊個孭？好嘞，當自己唔好彩，退番回程機票錢然後自己買飛又得唔得呢？國泰一度係咁講嘅，來回套票用咗一程，走嗰程唔搭係閣下嘅事，唔使旨意有得回水，亦即係話，閣下鍾意等就等，唔鍾意等悉隨尊便。苦主萬般無奈之下，惟有冒住大風雪揸幾粒鐘車去另一個機場，買今日凌晨機票返香港趕開工，飽受困擾之餘，仲額外花費近四萬大元，正一「終生難忘之旅」，唔肉痛就假。經過今次慘痛經歷，呢位仁兄見過鬼怕黑，話以後唔會再搭國泰喎。
國泰店大欺客，仲有冇再離譜啲吖！仲有冇再荒謬啲吖！航班delay明明係國泰責任，照顧旅客需要、盡快安排補飛亦係應有之義，點可以一句「貴客自理」就關人個關？點解係都要等到顧客投訴，傳媒曝光，全城鬧爆先至跪低，應承安排退款？
講起國泰嘅欺客醜聞，真係九日九夜都講唔完。再舉個例子，根據歐盟規定，喺歐盟國家機場起飛嘅航班，延誤超過四小時，旅客可獲賠六百歐元，唔使問阿貴，國泰方面梗係秘而不宣，直至有客人大興問罪之師，至死死地氣賠錢了事。至於其他受影響客人，斷估都係側側膊唔多覺。鬼咩，國泰delay多過食飯，揸正嚟做，容乜易賠到甩褲㗎！
大家有眼睇，國泰呢間百年老店，金漆招牌已經剝落得七七八八，加上今次滯日旅客善後安排又搞到一團糟，賠償又少過人，接走乘客又慢過人，結果搞到天怒人怨，剩番嘅丁點商譽都被北海道呢場世紀大風雪吹到冚包散。唔該國泰唔好再話自己係「香港人嘅航空公司」咯，今時今日咁嘅服務態度，你唔知醜市民都面紅喇！