民主黨（白鴿黨）前主席劉慧卿（卿姐）早年任職電視台記者時嘅吊帶裙照片，已傳得街知巷聞，但佢讀中學時嘅「學生妹Look」又見過未？卿姐尋日將自己讀中三時嘅班級大合照放上facebook（fb），仲問網民認唔認得出邊個係佢添！
卿姐喺fb上載咗一張攝於一九六七年嘅黑白照片，係佢喺跑馬地瑪利諾中學就讀中三C班時嘅班級大合照，仲留言叫網民搵佢出嚟。計番年份，當年卿姐只有約十五歲，而相中每位女學生都一面稚氣，要認出邊個係卿姐確實有難度。不過，有啲網民一眼就認出，就連佢嘅黨友黃碧雲（一舊雲）都話認到，唔知讀者又認唔認得出邊個係卿姐呢？
