中環出更：東華成員大雪滯日 施榮恆留港避一劫
北海道札幌早前受到五十年來最強暴風雪影響，大批旅客連日來滯留喺札幌新千歲機場，尋日卓妮喺沙田馬場見到東華三院前主席施榮恆（Ivan），講起佢哋東華一班董事局成員每年都會趁年尾一齊去一次旅行，而舊年同今年嘅目的地一樣都係去札幌，但佢就因為咁啱有事冇去到。佢都算係避過一劫嘞！
Ivan話近六十人嘅東華成員喺聖誕前兩日一齊去咗日本，原定會去札幌，依家就因為惡劣天氣嘅關係，部分人留咗喺東京，而有一半就選擇轉去大阪。本來佢都會一齊去，不過就因為要陪阿仔做手術，所以冇去到留咗喺香港。
轉頭見到博愛總理梁天富同太太Tina，問佢哋點解聖誕唔去旅行，梁天富就笑笑口指住太太個肚，原來太太嚟緊三月份就生得喇，真係恭喜晒！不過見梁太手腳依然咁苗條，真係唔係好睇得出佢正懷孕，唔通佢保持身材有秘方？梁太就話冇喎，連運動都冇做，亦冇食咩補品。唔知係咪因為咁，所以冇乜點肥喺其他地方？
驚被爆竊 梁天富唔住獨立屋
講起近排臨近歲晚，多咗唔少爆竊案，梁天富就話知道獨立屋特別危險，好多年前已經成日聽到獨立屋被爆竊，加上有地產朋友話佢知，獨立屋如果冇管理同保安會好危險，一旦畀人知道冇人喺屋企或者工人同外邊打龍通，話畀人知去咗旅行就大鑊，所以佢唔會買獨立屋咁話。
廠商會副會長史立德同太太史顏景蓮亦非常認同，話近日爆竊案「好狼」，但好在佢哋屋企長期有人喺度，而工人都只會輪流放假，保安措施亦做到足。史太又話過年都未諗去唔去旅行，不過一家人喺邊度都開心啦！
卓妮