中環出更：潘佩璆翻舊帳 轟非建制拉倒政改
選舉委員會選舉塵埃落定，民主派歷史性取得超過四分之一嘅席位，有機會左右特首選情並影響建制派部署。而喺勞工界連任選委嘅工聯會副會長潘佩璆就突然「翻舊帳」，鬧爆非建制派議員為咗堅持一定要無篩選，喺舊年六月帶頭否決政改方案，搞到大家冇得一人一票選特首。
潘佩璆尋日喺Facebook話，依照政府舊年提出嘅政改方案，選委會本來可以蛻變為提名委員會，並讓兩至三位候選人入閘，最後喺香港實現一人一票選特首。但係非建制派議員就罔顧香港仍未就《基本法》廿三條立法，拒絕中央政府喺選舉制度中確保國家安全嘅合理要求，堅持一定要無篩選，喺表決一刻不惜拉倒方案，令全港大多數市民失望。而潘佩璆最唔抵得就係非建制派，喺呢個佢哋一向鄙視，同貶稱為「小圈子」嘅選委會選舉入面，竟然搏老命搶席位，最後奪得三百廿幾席，遠勝上屆二百幾席。
鬧建制唔齊心致失利
鬧完泛民，佢亦鬧建制，話覺得建制派喺多個專業界別失利，並唔係因為大批選民倒戈支持對方，而係建制派喺成場選舉當中冇集中票源，扶助少數「自己友」入圍。
卓妮