美國候任總統特朗普被《時代》雜誌評選為本年度風雲人物，指他改寫了美國政治規則。這是《時代》第九十次評選年度風雲人物，全美對此有嚴重分歧，但老朽覺得這次評選冇乜好挑剔，選佢百分百正確。
特朗普大選勝出，全憑他口沒遮攔，是他一個人的口水戰力壓希拉妮。特朗普語不驚人死不休，示範了乜嘢叫做「好打得」。大選前，一眾共和黨高層公開表態不支持特朗普，甚至建議把競選資金用在國會選舉上。諷刺的是，大嘴巴用口水多過浪花嘅魅力征服全國近半數選民。嗱！呢啲就叫做「命裏有時終須有」，而希拉妮則是「命裏無時莫強求」，亦即《周易》的自然哲學：死生有命，富貴在天。正如北大教授李零所說，人有兩種命：一種是爹娘送的，一種是老天給的。前者是生命之命，後者是命運之命。世事無常，古人叫天命。欲知天命，乃有算命。
特朗普當然唔會去唐人街搵個算命佬睇吓有冇做總統嘅命運，老朽覺得佢不過係「順乎天而應乎人」。當年毛澤東「鼓之以雷霆，潤之以風雨」，特別懂得鬧革命，「下定決心，不怕犧牲，排除萬難，去爭取勝利」，哪像今天的小學雞一嚇就縮，比烏龜更不堪。而特朗普「挺之以朗日，照之以狂言」，據說有些大學教授受唔住佢當選嘅打擊，愁到唔想去上堂，亦有不少精英、中產話考慮移民加拿大。
大嘴巴經常亂噏嘢，好像他說要遞解逾千萬非法移民出境，肯定係廢噏，皆因程序複雜加上天文數字嘅成本，根本不可能。不過，特朗普喺商場縱橫咗咁多年，點都知道如何討價還價並找個下台階，佢之後改口優先遣返非法移民中的犯罪分子。有論者指出，特朗普是典型的表演型性格，老朽深有同感，而佢更大的動力是在別人的注視中自我感覺過癮，這風雲人物太逗了！