政情：公民講場：曾俊華夾硬衝燈 隨時墮崖

特首梁振英（CY）日前宣布棄選下屆特首選舉，政府尋日公布曾俊華（鬍鬚曾）向CY辭去財政司司長一職，今日開始休假，而佢隨即喺傍晚出嚟見記者，但只係講咗段感謝嘅說話，好明顯佢係唔敢越俎代庖，要等中央批核咗佢嘅辭職申請，先敢講自己參選特首。政圈一直盛傳中央唔贊成鬍鬚曾辭職參選，但係佢仲係要參選，究竟佢有乜把炮可以打低其他幾個疑似特首參選人，相信只有佢自己先知。之不過，喺冇中央祝福嘅情況下，要喺特首選舉中勝出簡直係不可能的任務，何況鬍鬚曾係唔理中央反對衝紅燈參選，博唔到仲隨時衝落崖呀！