政情：後生打波破相尹兆堅嘴上留疤
鍾意運動嘅人，難免有時會有損傷。民主黨（白鴿黨）立法會議員尹兆堅喺十幾歲時，就曾試過因為打乒乓波，被隊友用乒乓波板誤傷左邊嘴唇上方嘅位置，縫咗三針，足足十日先可以拆線，至今仍留有疤痕，而且講嘢嘅時候，左邊嘴亦明顯冇右邊咁自然。
尹兆堅話男仔又唔怕有疤痕，因為自己打波成日都有擦損，而且受傷後，亦冇影響佢對乒乓波嘅熱情，當年繼續喺校隊中效力，仲曾經喺九龍區一個比賽中攞到雙打亞軍添！佢又話當年最愛就係中國乒乓球隊嘅江嘉良，不過就未試過親眼見過佢，但自己當年亦曾效法江嘉良嘅打法，仲喺塊紅雙喜乒乓波板上，特別使一百蚊貼多塊膠，而呢一百蚊，當年都儲咗好耐錢o架！
之不過，佢喺中學畢業後就冇操乒乓波嘞，但閒時都有同個仔打吓波，因為阿仔見到其他人打，就好有興趣，主動叫爸爸教。睇嚟真係有遺傳喎。