政情：葉致欣姊妹 辦教琴空間
今時今日做生意，真係少啲創意都唔得。本身家族經營生產烘焙食材嘅「烘焙達人」、廠商會會員葉致欣（Coty）深明不進則退嘅道理，由本來只賣材料，到自己整埋蛋糕嚟賣，將杯子蛋糕結合港式茶餐廳文化，製成菠蘿油、凍檸賓等新奇口味吸引年輕人外，又諗住同妹妹葉盈欣（Yoland）拍住上教琴，但偏偏冇地方可以借畀私人鋼琴老師教琴用，搞到啲老師要靜雞雞搵地方傳授琴藝。
借地畀私教老師授課
Coty話香港好多小朋友學琴，佢細妹都係教琴嘅，不過就發現一直以嚟，私教老師除咗喺自己屋企或學生屋企外，就極難搵到一個合適嘅地方教琴，但一個女仔上學生屋企教琴唔放心之餘，掉番轉學生家長又會擔心小朋友上老師屋企係咪安全，偏偏琴行琴室又通常唔會借畀外來老師教琴，明明係明買明賣，但就搞到雙方往往要偷偷摸摸咁搵地方教學。
點解決呢？Coty話幾乎所有私教老師都遇過呢個難題，就決定同阿妹喺荔枝角搵咗個地方，畀呢班無助嘅私教老師借個空間之餘，仲可以一齊交流學習，相信對老師教學質素都會有提升。