政情：譚志源博大霧 叫加薪12.4%
明年特區政府換屆，特首梁振英已表明放棄連任，財政司司長曾俊華尋日就正式辭職，疑似「衝燈」參選明年第五屆特首選舉，而負責選出新一屆特首嘅選舉委員會界別分組選舉，亦都啱啱喺前晚結束，當選票都未點算好之際，政制及內地事務局局長譚志源（Raymond）就趁亂鬼祟建議政府司、局長等政治問責官員加薪逾一成二（12.4%），明年七月一日生效。政府對土地房屋等民生問題束手無策，民望低處未算低，依家仲提加人工，唔通Raymond諗住到處都係火頭，乘亂博大霧，側側膊就唔多覺？
政制及內地事務局尋日向立法會提交文件，指香港特別行政區行政會議成員、立法會議員及政治委任制度官員薪津獨立委員會，建議第五屆政府委任官員加薪，局長薪金加幅逾一成二，即由依家嘅大約二十九萬八千元加至約三十三萬五千元，而局長、律政司司長、財政司司長同政務司司長嘅薪酬差距，就維持喺三點五個百分點，即律政司司長薪金由依家卅萬八千多元增至卅四萬六千多元，財政司司長由卅一萬九千多元增至卅五萬九千元，政務司司長就由約卅三萬元增至卅七萬一千多元。副局長薪酬就維持喺局長薪金嘅六成半至七成半水平。
而對於過往畀外界質疑薪酬過高嘅政治助理，獨立委員會就建議各司、局長應根據個別政治助理須履行嘅職能，自行決定薪酬水平，並以局長薪酬嘅三成半為限，較以往嘅三成半至五成半低。而文件亦提到薪酬水平其實由○二年至今都未調整過。
留任與否 未有表態
Raymond尋日就話自己加入咗政府卅年，依家嘅政治環境改變咗，願意加入政府成為問責官員嘅人，都會面對更困難同複雜嘅政治環境，要完全有心、有志服務社會嘅人，先可以超越眾多嘅心理障礙同外在環境限制而加入政府班子，認為依家嘅薪酬調整機制，對有志服務市民嘅官員作出認同，不過就唔足以令人考慮加入政府咁話。佢嘅講法有幾多人認同就真係唔知喇！
至於Raymond自己會唔會加入下屆政府班子，Raymond就只係話自己○八年脫離咗鐵飯碗，脫離咗政務官行列出任問責官員，依家已經八、九年，仍在繼續努力喎。唔知如果立法會通過司、局長加薪建議，Raymond繼續努力做埋下屆政府嘅意欲會唔會大啲呢？