中環出更：向災民伸援手 「泰」有愛心獲獎
港澳台灣慈善基金會（基金會）主辦嘅愛心獎早前舉行頒獎典禮，六名來自兩岸四地嘅得獎者，包括熱心公益嘅台塑集團總裁王文淵、向台灣地震災區少年伸出援手嘅空手道黑帶高手黃泰吉，同埋拯救內地服刑人子女嘅太陽村創辦人張淑琴等。做咗多屆愛心獎評委嘅智行基金會主席杜聰話，今屆得獎者之中令佢最感動嘅係黃泰吉，佢連續三年提出申請，而每次都投黃泰吉一票，今次終於得咗。杜聰笑稱遲獲獎仲好，因為獎金年年增加喎。
幫助內地愛滋孤兒嘅杜聰幾年前亦曾獲頒愛心獎，佢笑稱當年獎金係十萬港元，今年已遞增至九萬美元，即約七十萬港元。由於獎金逐年加碼，所以佢鼓勵有愛心人士踴躍申請，唔使怕失敗。點解佢咁支持黃泰吉？杜聰話對方專收留血氣方剛、失去家庭嘅少年，仲教佢哋空手道，唔少人打入國際性賽事三甲添！印證無論人生起步點有幾低，只要努力，人人都可以係世界第一。
好友紛支持 林添茂感動
基金會主席張佐民就被張淑琴嘅善行所感動。佢話內地官二代、富二代聽得多，張淑琴幫嘅係「罪二代」，即係父母入獄服刑嘅小朋友。張淑琴排除萬難喺內地監獄附近廣設太陽村，令人動容。同場仲有一班由台灣來港嘅重量級嘉賓，包括統一企業前總裁林倉生、台灣公益平台文化基金會董事長嚴長壽等人。愛心獎創辦人林添茂見咁多好友嚟支持，感到好鼓舞，笑言要努力賺錢，繼續發掘心有大愛之人。
卓妮