中環出更：音樂打氣「妮」勉港青勿言棄
博愛醫院早前喺元朗劇院舉行「博愛青年音樂會」，邀請多位年輕歌手及樂隊與台下一眾中學生齊齊唱歌作樂，以籌募擴展青少年服務經費。博愛醫院主席陳李妮（Lily）話，時下年輕人要面對嘅困難和挑戰愈來愈多，希望透過音樂宣揚積極嘅人生觀，勿輕言放棄。元朗區議會主席沈豪傑都現身撐場，仲特登揀唱一首快歌，話快歌啱台下學生聽多啲喎！
Lily一向鍾意唱歌，今次請咗好多唱得之人，包括雙目失明嘅青年鋼琴家劉亦強。Lily讚劉亦強雖然失明但一直堅持實現理想，所以特登安排佢同台下一班同學分享心路歷程。Lily仲請埋自己讀中學時嘅班主任及同學一齊參加音樂會，事關台下都係中學生，令佢諗起當年，仲話做人要珍惜緣分，就算離開校園都唔代表緣分就此結束。
沈豪傑冀社會和諧少批評
沈豪傑就話，香港嘅投訴文化盛行，但係經常投訴不免令人苦惱。佢又話，要批評人哋好容易，但係建設一樣嘢就好難，所以寄語大家少啲批評，令社會和諧啲。唔知佢係咪做咗區議會主席之後，因為經常要平衡各方利益，所以有感而發呢？
音樂會籌委會聯席主席兼博愛副主席李柏成、總理梁天富等人都有到場。有調查指港青快樂指數屢創新低，李柏成話，音樂可以發放正能量，唱歌亦係最好嘅溝通方法，年輕人多啲唱歌就冇咁多煩惱喇！佢仲話，今次音樂會係首次舉辦，希望可以年年傳承落去。
卓妮