政情：公民講場：缺席橫洲公聽會 波叔張炳良唔使摸底？

元朗橫洲公屋發展爆出「官商鄉黑」風波幾個月，政府被指只向鄉紳「摸底」，並且因為遭鄉事派反對收地而轉向居民開刀。立法會尋日召開公聽會，邀請超過七十個團體同市民表達意見，但係竟然無問責官員出席。運輸及房屋局局長張炳良、發展局局長陳茂波連影都冇，引起村民同立法會議員強烈不滿。有受影響村民炮轟當局欺善怕惡，哭訴畀人「當垃圾咁掃出嚟」。咁又係，政府曾於東窗事發後辯解「摸底」係一貫做法，唔通今次就係要話畀大家聽，政府只向權貴「摸底」，市民大眾嘅意見就唔使認真聽呢？