政情：潮興VR 洪為民唔怕智能叛變
虛擬實境（VR）技術近年日益普及，唔少行業包括電子遊戲、教育等都紛紛應用呢個技術，互聯網專業協會會長洪為民（Witman）尋日出席活動時話展望將來，虛擬實境同人工智能都唔會出現好似電影情節咁，有操控人類嘅情況出現。
邱達根預料淘汰部分行業
佢解釋，科技本身冇任何感情元素，其應用比較多係重複性工作，或者提供資訊協助人類，就算早前人工智能捉棋贏過人類，都只係運算數學嘅結果。
同場嘅香港資訊科技聯會會長、荔園主席邱達根對虛擬實境近年大行其道有另一個睇法，佢估計未來二、三十年後，虛擬實境可能取代實體遊樂場，事關虛擬實境依家已經發展到可以用嚟睇樓，未來地產經紀呢個行業都可能會無咗。
但係，邱達根承認，虛擬實境仲有唔少技術問題需要解決，舉例話至今佢仲未試過玩一隻虛擬實境技術嘅遊戲，可以超過廿分鐘，因為好多肢體動作好似行路咁，身體實際上並冇移動，需要時間適應。