中環出更：立會酒會 長毛鬧CY廢柴 影大合照 羅冠聰遲到被噓
新一屆立法會開始近兩個月，來自跨黨派共六十幾名議員尋日齊集影大合照，立法會主席梁君彥其後於黃昏時間舉行酒會，邀請特首梁振英（CY）等港府高官、立法會議員出席，廿幾名非建制派議員事先張揚杯葛酒會，唯一例外係社民連「長毛」梁國雄，佢手持示威標語連同兩支柴向CY示威，比喻政府同特首都係廢柴，並向CY高叫「大話特首，廢柴政府」等口號，CY全程對此充耳不聞，仲背住長毛，只顧同工程界議員盧偉國等人交談，長毛最後被逐出酒會。
今次酒會係新一屆立法會開展後首次舉行，不過有別於以往搞午宴嘅做法，今次酒會喺下午四點半左右開始，大約黃昏六點結束，梁君彥喺酒會致詞時就此解畫，話因為立法會收到太多官司個案，搞到資源有限，所以希望官員多多包涵，並笑言或者可以叫財政司司長批多啲撥款，現場所見，梁君彥突然搞爛Gag，成功令部分在場人士笑不攏嘴。
張宇人林健鋒有傾有講
雖然酒會喺廿幾名非建制派議員杯葛下，只剩低一批建制派議員撐場，但仍然無損佢哋同在場政府官員交流，其中身為律師嘅建制派議員周浩鼎同保安局常任秘書長羅智光好好傾，而新任行政會議成員張宇人更一度同前黨友，依家同為行會同事嘅商界林健鋒摸住酒杯底有傾有講，唔知林健鋒有冇趁機向張宇人推銷，其所屬工商政黨最新提出取消強積金制度，改行中央公積金嘅建議呢？
另外值得一提嘅係，酒會舉行前嘅議員影大合照環節，原本撇除已被取消議員資格嘅青年新政游蕙禎及梁頌恆，理應最多有六十八名議員，但最終只有六十一名議員現身，缺席者包括自決派劉小麗、民建聯梁志祥、工聯會陸頌雄、何啟明同郭偉強，而同劉同屬自決派嘅朱凱廸一度現身，但表明唔參加影相就離去，最令人意想不到嘅一幕，係香港眾志羅冠聰遲到中途加入，惹嚟一批議員噓爆「贈興」，搞到羅只能以笑遮醜。
卓妮