政情：白鴿黨新總幹事勾結台獨勢力？
青年新政梁頌恆及游蕙禎早前到台灣出席講座，被國台辦狠批勾結台獨勢力。民主黨（白鴿黨）候任總幹事蔡雨龍，原來同台灣嘅關係亦都千絲萬縷，佢堂兄正是台灣民進黨籍立法院副院長蔡其昌。不過蔡雨龍就強調，自己反對台獨同港獨，唔擔心會連累白鴿黨被指勾結台獨。
蔡雨龍堂兄屬民進黨
蔡雨龍尋日同傳媒茶敍時自爆，佢爺爺同太太都係台灣籍，太太家族中有人係台灣公務員，支持藍營，而堂兄蔡其昌就係綠營嘅，因此可以話兩邊都有聯繫。至於佢自己就係持有特區護照，冇其他外國國籍，係地道嘅香港人。
蔡雨龍嘅上手林卓廷因為當選立法會議員而唔再做總幹事，但佢就承諾自己「N屆唔選」，只希望做好黨務，鼓勵更多年輕人代表白鴿黨出選，目標係喺五年任期內，將該黨嘅區議會議席增多十個以上喎。