政情：冇人理 遭挑機 遇示威 肥彭「回魂」之旅一波三折
末代港督彭定康（肥彭）近日訪港，係香港回歸近廿年嘅第七次「回魂」，佢尋晚到香港大學出席與大學生對談嘅活動，討論香港前途同大學管治問題，肥彭離港在即諗住可以無風無浪，最後結果係一波三折，先遇上建制團體示威「贈興」，高呼肥彭滾出中國及香港等口號，其後對談活動嘅地點又坐唔滿多「吉位」，最後肥彭更被本土派當面挑機，肥彭「回魂」之旅最終似乎草草收場。
肥彭尋日出席對談活動前，建制團體「珍惜群組」一行十幾人率先到港大校園示威，高呼「彭定康滾出中國、滾出香港」等口號，又批評曾任大學校監嘅肥彭荼毒香港大學生，港大一方表明拒絕示威團體進入校園，示威人士只可在港大校園外表達訴求。
對談活動逾百人「甩底」
除咗有團體示威「贈興」，肥彭尋日對談活動有唔少「吉位」。據主辦單位方面稱，本來有千八人報名參加是次對談，但入到對談地點港大陸佑堂，預先預備咗嘅五百幾個坐位，經估算後入座率只有六、七成，即最少有百幾人報名後「甩底」。
當正式進入對談環節，本土派一有機會就出擊向肥彭發問挑機，其中早前被取消參選立法會資格、本土民主前線梁天琦當面反駁肥彭日前唔支持港獨嘅言論，並反問對方係咪要港人放棄自己嘅權利來換取北京安撫；香港眾志羅冠聰則提出與自決有關嘅問題。
肥彭回應時即刻開火稱，梁天琦嘅立場完全錯誤，而且自欺欺人，又指梁天琦大可就港獨議題繼續雄辯滔滔，贏取短暫掌聲，但咁做絕對唔係好主意。佢於活動結束後會見傳媒時繼續指指點點，指自決同港獨本質上一樣，而且都唔會成功，重申學生可以堅持己見，最重要係社會要作出理性討論。