政情：辭行會選特首？葉劉：咪陷害我
負責選出下屆特首嘅千二人選舉委員會，仲有唔夠兩個禮拜就全部產生，但至今已宣布會參選特首嘅，點睇都只係陪跑角色，極有可能連閘都入唔到。各名較有分量嘅疑似特首候選人，個個都唔敢公開起跑住。無他嘅，大家都知下屆特首誰屬，最決定性嘅唔係能力、民望、或者政績，亦都唔係千二人選委會嘅組成或意向，而係阿爺最後揀邊個。其中一名疑似人選、新民黨立法會議員葉劉淑儀，尋日被問及係咪會喺下月中辭任行政會議成員宣布參選時，更加高呼遭到陷害。梗係喇！阿爺都未開綠燈就跑咗出嚟，容乜易因為偷步而取消參賽資格。
葉劉尋日出席一個題為「香港新願景」嘅論壇時，被同樣盛傳有意參選特首嘅前立法會主席曾鈺成突襲，問佢係咪會喺下月十四日、即選委會選舉有結果同新民黨舉行黨員大會後，宣布辭任行會成員？葉太立即尷尬咁答：「你唔好玩我喇，真係陷我於不義！」
稱堅定服務香港
唔通葉劉已放棄參選大計？睇落又唔似喎。葉劉喺論壇上強調，自己服務香港嘅心一直好堅定，包括從來冇尋求出任任何私人公司嘅非執董，以免出現利益問題，過往籌款亦只為旗下嘅智庫同政黨，不涉及個人，因此喺從政初期使咗好多錢，多到連個女都投訴。
選情仍「好大變數」
曾鈺成喺論壇上又指出，中央至今仍未表態支持或唔支持現任特首梁振英（CY）連任，今屆特首選舉究竟係有競爭、冇競爭、定只有假競爭，佢到依家都睇唔通。葉太形容「咁係一件非常好嘅事」，強調千二人選委會將會點揀特首仲有好大變數，例如英國嘅脫歐公投同美國總統大選，結果都係出人意表，反映民調不可盡信。佢認為一個成功嘅特首，需要喺未來五年有效管治，包括領導公務員同團結議員、「唔會令到好多人上街」等，擺明係寸緊CY。
最近臨急重拾一支筆、一本簿，再加多一部平板電腦落區聽民意嘅CY，尋日亦有多項公開同閉門活動，但仍然未有就係咪角逐連任表態。至於盛傳已向中央表明參選意向、連競選辦公室都租埋嘅財政司司長曾俊華（鬍鬚曾），尋日趁例行訪京走訪咗多個中央部委，包括同港澳辦主任王光亞會面咗約四十分鐘，事後雙方都隻字不提阿爺係咪畀鬍鬚曾參選。睇嚟大家都係要繼續等落去。