中環出更：嫌「人」唔通知 田少被爆料反寸
自由黨主席兼飲食界議員張宇人（Tommy）於上周五獲委任為新任行政會議成員，事前無通知該黨榮譽主席田北俊（田少），惹來田少促請Tommy辭任黨主席，Tommy繼日前爆料反駁田少，尋日再出招寸對方，透露據其理解，未正式加入行會前唔應該同任何人透露，其後疑以其人之道還治其人之身，進一步爆料指十幾年前，時任黨主席嘅田少被邀加入行會時，自己事前對此亦唔知情。
張稱時間沖淡一切
Tommy尋日出席電台節目再就獲委任為行會成員解畫，首先承認同田少係朋友，自言同對方食飯多過同太太吃飯，而過去周末無就今次事件同田少傾談，佢相信對方瞓醒就會忘記，時間可沖淡一切。佢重申，自由黨需要自己，暫無人選可代替，亦唔希望長時間擔任黨主席，未來應由年輕人接棒。
此外，代表商界嘅Tommy獲委任加入行會，令嚟自勞工界嘅工聯會榮譽會長陳婉嫻（嫻姐）有微言。佢尋日喺免費報章專欄上稱，自己對Tommy無太大意見，但喺階級立場上，其一言一行所代表住極右、最尖酸商界立場，並由此引申於拉攏商界背景下，質疑現屆政府喺未來個多月時間，如何兌現數年前對勞工界開出嘅多張期票。
卓妮