中環出更：名人健康飲食盡「素」心得
愈來愈多人注重健康嘅生活方式，卓妮早前見到帶領素食風氣嘅社企Green Monday創辦人楊大偉（David），講起推廣健康飲食文化，佢除咗提倡素食外，仲留意到近期杏仁奶喺美國好受歡迎，皆因杏仁奶比牛奶多咗一種香味之餘，仲更有營養價值。佢又提及，杏仁奶除咗可以就咁飲外，仲可以用嚟沖咖啡同代替牛奶沖穀類早餐食，佢朝早都好鍾意就咁沖嚟食。
David等人旗下位於尖沙咀賣素食材料嘅Green Common店舖兼餐廳開幕，執行委員之一嘅「手套女王」林曉盈（Juliana）等人亦有到場支持，見Juliana皮膚長期咁白淨，談及美顏心得，佢就話除咗食素，佢仲會每朝斟兩大杯暖水，滴幾滴檸檬汁落去，飲完之後先再準備換衫出門，既可以清吓腸胃，皮膚都靚啲咁話。
林曉盈推介仿肉入門
Juliana其後講到食素嘅選擇，話好多人一聽到食素，就覺得選擇唔多，或者有疑問會唔會唔夠飽等，佢認為，其實呢個係心理作用，嚟緊佢哋餐廳有好多好吸引嘅素食餐單，包括用人造肉製作嘅海南雞飯咁，最適合啲初入門嘗試嘅素食者，吸引佢哋再慢慢發掘，原來素食都可以好多采多姿同美味嘅。佢仲話，自己周不時會喺屋企用幾種豆煲湯，清甜過用肉類煲湯，仲好飽肚添。
Green Monday執行總監陳貝兒、金紫荊女企業家協會主席彭芷君同常務副主席丘璟珊亦有嚟捧場，彭芷君透露近日皈依佛教，雖然唔係一定要食齋，但都食得清淡咗好多。丘璟珊就話平日夜晚應酬太多，所以間唔中就會搵一、兩日食吓素平衡番。
卓妮