政情：公民黨換屆 謀霸九西虛位
公民黨（公文袋）尋日舉行換屆選舉，一如所料由已棄選立法會嘅梁家傑出任黨主席，現任立法會議員楊岳橋就擔任黨魁，兩名副主席分別為啱啱重返立法會嘅陳淑莊同該黨原秘書長賴仁彪，另有多名年輕黨員進身執委會。
不過外界最關注嘅，反而係毛孟靜退出公文袋後，該黨會搵邊個接替佢喺九龍西個位，以及會唔會派人出戰因青政游蕙禎被搣柴而須舉行嘅立法會九西補選，當中以油尖旺區議員余德寶，以及曾經出戰美孚但落敗嘅李俊晞呼聲較高。李俊晞被指係毛孟靜嘅愛將，余德寶就獲較多主流派黨員支持，兩人尋日雙雙當選執委，反映該黨仲未揀定人選。
容溟舟「再轉會」入黨
梁家傑表示，毛孟靜退黨只有好短時間，依家講接班或者出戰補選屬言之尚早。但據聞黨內有唔少人都認為，依家距離立法會換屆仲有三年幾，無理由唔派人參加補選霸番九西個位。
此外，原來沙田區議員容溟舟最近入咗公文袋，成為該黨喺新界東嘅首位區議員。容溟舟最初係民主黨人，後來退黨同范國威等前民主黨成員組新民主同盟，到最近又退出咗新同盟，所以今次已經係第二次轉會，唔知佢會喺公文袋留幾耐呢？