政情：大包圍搶選委 傘兵擸走建制位

共逾330人報名參與

六大宗教選委界別當中，基督教、佛教、道教、回教及孔教過往都係由相關宗教團體互選產生，當選嘅絕大部分為親建制人士，唯獨係天主教界就係以抽籤方式選出，因此偶爾會有泛民人士當選。

不過，喺非建制教友嘅壓力下，今年基督教界亦改以抽籤方式選出十名選委，雖然具體做法仍然無天主教界咁開放，但最後都有三十幾人入到閘參與抽籤。至於全無篩選嘅天主教界，更加有超過三百人報名，最後邊個選到、邊個選唔到，名副其實係各安天命。

呢兩個宗教界別嘅選委抽籤程序，尋日喺政府總部由相關選舉主任主持下進行，結果十名基督教選委分別為楊得宇、林亨利、朱吉偉、鄧惠儀、鄭志仁、陳可欣、朱世平、余瑞堯、萬嘉良同劉致滔；十名天主教選委則為盧惠德、黃宗顯、鍾燕燕、吳明謙、張俊挺、黃浩峰、溫少輝、郭子錕、梁子勁及葉慶祥。當中只有朱世平同張俊挺係成功連任，即係九成當選者都係新人。

管浩鳴藍鴻震連任失敗

多名較知名嘅黃絲候選人，包括「法政匯思」嘅任建峰同佢班朋友、本土派嘅香港民進黨楊繼昌等，今次都抽唔中籤落選。不過佢哋都話對抽籤結果唔感到失望，因為多名知名親建制候選人，例如參選基督教界嘅聖公會教省秘書長管浩鳴，參選天主教嘅徐錦堯神父同前高官藍鴻震等，最後亦抽籤失敗。任建峰更加透露，其中一名被抽中嘅天主教界選委葉慶祥，原來係黃絲組織「鳩嗚團」嘅成員，肯定唔會支持梁振英連任，證明佢哋嘅大包圍策略成功。