政情：馮檢基 李卓人失議席倒貼填氹

馮需支付逾百萬元

空降新界西嘅馮檢基，選舉開支為一百四十多萬元，而所得嘅捐贈只得約二十萬元，當中民協捐贈逾十七萬元，包括三千多元嘅免息貸款，而數名民協成員及其立法會議員辦事處亦分別捐咗數千元及五千多元，另有一名人士以現金捐贈一萬元。扣除捐贈，最終佢需支付逾一百二十萬元嘅選舉經費。

早前馮檢基發布與太太愛情故事嘅微電影，有關製作團隊亦以同一價錢即六萬元，為佢拍攝另一套名為《我是屋邨仔》嘅微電影。另外，佢亦被食環署多次檢控，合共罰款三千多元。

李卓人與黨友趙恩來合組嘅名單，選舉開支為九十八萬多元，而工黨、職工盟及一電影製作公司合共捐贈逾八十七萬元，故佢哋分別只需支付約五萬多元。

另外，熱普城聯盟分別喺新界東及九龍東落敗嘅陳雲及黃洋達，各自花逾百萬元，而佢哋所屬嘅熱血公民、普羅政治學苑再加上其他人嘅捐款，足以支付全數選舉開支，兩人唔使付上一分一毫。