政情：功能失守 工商界有排受
立法會尋日通過由工聯會黃國健提出，要求政府取消強積金對沖嘅動議，雖然呢項動議並無法律約束力，但對勞工界嚟講仍別具意義。首次先動議提醒特首梁振英唔好走數，必須盡快兌現四年半前競選承諾，逐步落實取消對沖機制。其次係今次投票結果，反映咗傳統工商界勢力嘅沒落，已正式失守分組點票，未來四年喺立法會都會畀班勞工及草根派議員撳住砌。估計一眾勞工界議員喺往後四年，會輪流就標準工時立法、調高最低工資、增加勞工假期，以至重設集體談判權等提出形形色色嘅動議，向政府施壓兼打殘工商界。
《基本法》規定任何議員議案均需經過分組點票，即係同時獲地區直選同功能界別分組嘅在席過半數贊成，有關議案先至能夠通過。過往直選分組一直係勞工及草根派議員嘅天下，但功能界別分組就啱啱相反，由工商界佔多數，因此絕大部分勞資雙方未能達成共識嘅勞工政策議案同修正案，結果都係四大皆空、互相否決居多。
林健鋒鍾國斌等缺席
不過，隨住功能分組增加咗五個等同直選嘅超級區議會議席，以及自決派嘅姚松炎爆冷贏得建築界議席，傳統工商界已慢慢喪失喺功能分組嘅優勢。經民聯六席、自由黨四席、加上五散人及廠商會吳永嘉，合共只有十六席，少於全部三十五個功能議席嘅一半。
再者五散人當中嘅保險界陳健波、體文界馬逢國、金融界陳振英等，對部分勞工議題嘅立場亦有別於傳統工商界，佢哋三個尋日就對取消對沖機制議題投咗棄權票；再加上經民聯林健鋒、石禮謙、張華峯同自由黨鍾國斌缺席投票、本身代表進出口界嘅黃定光「歸隊」跟番民建聯投贊成票，令議案最終喺功能分組以十六票贊成對八票反對大比數通過。
建制派投票各有各投
直選分組方面，尋日只有三人投咗反對票，包括經民聯梁美芬、獨立建制派謝偉俊及新民黨田北辰，但係身兼行政會議成員嘅新民黨主席葉劉淑儀同另一新民黨議員容海恩就投咗贊成票，真係令人費解囉！