中環出更：郭位藉教煎魚 大談心件
國際華商協進會（華商會）早前舉行晚宴，邀請城市大學校長郭位分享人生智慧。郭位係核能研究專家，不過就好鍾意煮嘢食，早前仲出咗本書大談「心件」，即係如果想做好件事，除咗必備軟件及硬件之外，仲要有「心件」，因為用心亦係成敗關鍵。郭位舉例話，家庭主婦煎魚時最怕啲油亂咁爆，惟有借助筷子或鑊剷，但其實煎魚最好嘅廚具係隻手，仲話只要用心就唔怕被油濺親喎。
聽落好似練神功咁，其實道理好簡單。郭位話用心諗諗，油會亂咁爆係因為有水，所以只要將魚徹底抹乾，用手捉住魚尾煎就無問題，怕油濺親只係心魔作怪。
胡晴舫甫上任 忙搞活動
華商會理事兼深圳海石集團總裁潘海飛好認同，好似最近佢哋喺羅湖區坳下村進行舊區改造，短短幾個月即獲二百八十多戶村民全票通過，喺內地好罕見。關鍵因素係佢哋用心聽取居民訴求，盡量企喺村民角度着想，村民唔止可以分得與被收購舊屋面積一樣嘅新屋，仲有一筆現金補助工程期間嘅租金開支添！
海石集團係寶源基業主席戴澤良旗下一個投資項目，戴澤良話呢種做法值得香港參考。香港一講到收地遷拆就遇到反對，好大原因係村民唔願離開熟悉嘅家園，若村民可獲原區安置，阻力或會大減。台北經濟文化辦事處處長嚴重光同光華新聞文化中心新主任胡晴舫都有到場，胡晴舫一上任即忙於「台灣月」活動，華商會會長羅台秦仲趁機呼籲大家買飛入場支持添！
卓妮