中環出更：「超」創基金 助港青建身份認同

陳承邦（右）及弟弟陳承志（左）跟隨爸爸腳步，投身慈善事業。

陳國超兒子兼仁愛堂副主席陳承邦話，基金除咗助港青搵番身份認同之外，亦會培育年輕人感恩之心，學會尊重自己及別人。佢話後生仔唔信人講，最好自己親身去睇過，所以佢哋會透過舉辦活動帶港青實地參觀。早前陳國超就贊助圓玄旗下學生到內地參觀，當中梗係包括南京大屠殺遇難同胞紀念館，令學生實地感受日本侵華對中國人嘅傷害。嚟緊亦會研究帶佢哋去日本靖國神社睇吓，等後生仔自己判斷呢段歷史。

林赤有難忘被困敦煌風雪

身兼家校會主席嘅圓玄副主席湯修齊指最近有研究話，如果年輕人嘅人際關係及正面人生觀建立得唔好，可能會成為社會隱患，期望新成立嘅基金可以喺呢兩方面幫到年輕人。同場仲有蓬瀛仙館副理事長林赤有同仁愛堂總理蔡小勇。林赤有講起一段難忘經歷，話說多年前佢哋去敦煌考察，喺戈壁期間遇到大風雪，一眾團友停車熄匙小休後，因為太凍導致架車撻唔着，搞咗幾個鐘，成團人飢寒交迫，好彩最終有驚無險咋！

蔡小勇（左）及林赤有（右）係慈善界多年老友。

陳國超（中）成立青年發展基金，鄧錦雄（左）同湯修齊（右）齊讚好。（徐家浩攝）

卓妮