曾俊華日前出席一個講座，被問到是否已經向中央辭職及何時宣布參選，他以一貫嘅謹慎「欲說還休」，一如佢做財政司司長，理財來來去去都係嗰幾招，穩穩陣陣，不求有功，但求無過，年年估錯數，到時有大幅盈餘就係咁意派吓糖，如此理財「天才」，咁就做咗十年！
其實鬍鬚曾都有值得年輕人學習嘅地方，就係佢講嘢夠晒謹慎，談經濟與危機，講來講去就係「外圍環境持續不穩」、「環球經濟缺乏動力」……是以香港經常面對艱難一年，之不過總是年年艱難年年過，一如不懂得「生涯規劃」嘅老朽，生命沒有奮進，得過且過。鬍鬚曾講嘢永遠如耍迷蹤拳，問佢何時宣布參選就話係「天機」，再問佢遞信辭職選特首未？又祭出陳年老調：如果我對香港有貢獻，我係絕對會考慮任何事情……我都唔講太多啦。
鬍鬚曾所謂「對香港有貢獻」，真係廢到唔廢，係納稅人打工仔都對香港有貢獻o架啦；若僅僅是一個理念「對香港有貢獻」，咁人人都可以出嚟選特首啦！
曾經做過鬍鬚曾上司嘅葉劉淑儀，她評價財爺過去十年的表現，話覺得他有點hea，換言之即係懶散。一個高官若然hea做，咁佢對香港呢本咁難讀嘅書，又點會老老實實去求真？香港如今社會撕裂，矛盾日益嚴重，激進港獨成為計時炸彈，一個hea住做嘅高官，其政治人格唔掂，其政治能力又會高得去邊？
鬍鬚曾呢位善走位嘅「香港仔」就為自己解嘲，指財政司司長是重要工作，「如果真係hea到十年都幾有天才」。乍聽之下好似幾有道理，然而，政府高官德不配位者多的是，才不稱職者更比比皆是，由這樣的「天才」治港，若然有好結果，老朽必大破慳囊，請你飲咖啡睇法國電影，讓你也過一把「中產」癮。