政情：EQ內地網絡平台賣選舉廣告
立法會選舉結束咗將近兩個月，選舉事務處陸續公開參選人嘅選舉開支申報。循新界東地區直選進身議事廳嘅民建聯（民記）葛珮帆（EQ），選舉開支達二百二十六萬元，其中選舉廣告開支高達二百萬元，搞開資訊科技嘅佢十分重視網絡戰場，使成廿萬喺網上賣選舉廣告。不過翻查申報資料，發現佢部分宣傳片竟然係喺內地網絡平台播放。
話用香港IP位址先睇到
有份播EQ選舉宣傳片嘅內地網上平台包括優酷（YouKu）、土豆（Todou）同愛奇藝（iQiYI）等，EQ用咗七萬元喺上面賣廣告播短片，同時佢亦使咗十三萬元喺雅虎香港買位播片，淨係網上廣告就用咗二十萬元，佔廣告開支總數一成，可見佢幾重視網絡戰場。EQ接受本報查詢時解釋，話近年愈嚟愈多香港人用呢類內地網絡平台去睇內地劇，今次賣廣告係睇吓發唔發掘到新票源，又指設定只有香港IP位址先睇到廣告，強調內地市民係睇唔到。
為咗發掘票源，EQ所屬嘅民記的確用咗唔少方法，包括用六千元喺一份名為「Weekly Jang Hong Kong」嘅巴基斯坦報紙賣廣告，實行任何階層同界別嘅潛在選民都唔放過咁話。