政情：何啟明水戰何啟明

話說立法會福利事務委員會尋日朝早召開特別會議，就康橋之家事件討論私營殘疾人士院舍質素嘅問題。工聯會嘅何啟明就喺社交網站上載出席委員會嘅團體同個別人士嘅座位表，並留言指「何啟明到了，何啟明缺席」，意指已報名出席委員會嘅身兼青年民協召集人嘅何啟明缺席會議。好明顯，佢係抽水，話民協何啟明「放人飛機」喇！

民協何啟明接受查詢時解釋，佢一早已報名出席尋日朝早嘅委員會會議，仲準備咗相關文件，但上周五喺澳洲珀斯跳傘時不慎弄傷右腳，回港後預約求醫，咁啱約咗尋日朝早進行物理治療，所以未能出席會議。佢話會將已準備好嘅信件提交立法會，質疑工聯會嘅何啟明點解開會仍「得閒抽水」，仲話工聯會應促請政府徹查事件。

不過，工聯會何啟明仍然揪住對方唔放，佢喺facebook留言：「如果我真係放人飛機，我會講對唔住。」仲hashtag：「玩到影響工作」、「我想旅行」、「我都想放假」，擺明係再寸民協何啟明，而民協何啟明就反擊話：「我覺得呢個人相當無聊。」唔同場都隔空互寸，可以想像，佢哋同場嘅話，肯定擦出火花。

樣貌相似 政途卻迥異

其實兩個何啟明喺早前嘅立法會選舉已引起關注，事關佢哋同名同姓，兼且個樣都好相似，好易令人搞錯，但兩人嘅政途卻迥異。一個循勞工界功能界別進身議會，而另一個因選前支持率低，棄選俗稱「超級區議會」議席。

工聯會何啟明早前同傳媒茶敍時提及民協嘅何啟明，都有啲寸寸貢o架，佢話自己比民協何啟明早一屆出道，一一年已成為觀塘區議員，但對方舊年年底先當選深水埗區議員，又指自己喺舊年年底換上黑框圓眼鏡，估唔到另一個何啟明近日亦轉換類似款式眼鏡，「抄都係佢抄我」。佢仲透露，接過一些深水埗街坊嘅電話「搵錯何啟明」，佢笑稱自己服務嘅街坊應該唔會搵錯人。