政情：今日你上鏡：陳浩濂搞回收 兩噸收穫

區議員派蛇齋餅糉就聽得多，掉番轉頭搞回收嘅都可能有人做嘅，但回收名牌物品，就可能要喺「富貴區」先做得到嘞！中西區山頂選區區議員陳浩濂（Joseph）尋日就搞咗個「循環回收大行動」，竟然回收咗逾兩噸嘅物品。住得山頂通常都非富則貴，所以回收嘅物品都唔簡單，有名牌行李篋、名牌衫、LCD電視、手提電腦、單車同遊戲機等，就連結他都有兩支，只要你噏得出嘅都有。Joseph話今次有逾百名居民支持，嚟緊佢會將回收到嘅物品捐畀救世軍，幫助有需要嘅人，費事丟晒去堆填區咁浪費喇！