政情：硬銷政策 吳得掂出賣助理
教育局政治助理施俊輝（Jeff）四個月前升呢做爸爸之後一直都保持低調，除咗間中喺facebook貼囡囡啲靚相之外，其實都無乜周圍同朋友宣揚「弄瓦之喜」，仲話「好多朋友都係百日宴先知道（我做咗爸爸）」。不過，其實有唔少記者朋友一早已經收到風，到底係邊個爆響口呢？有人懷疑係外號「吳得掂」嘅教育局局長吳克儉。
爆響口施俊輝太太懷孕
話說喺今年初，吳得掂同傳媒茶敍宣傳「免費優質幼稚園計劃」嘅時候，已經爆響口話「我嘅政助都有受惠o架！」當時Jeff嘅太太應該已經腹大便便，吳得掂咁講即係出賣政助，借Jeff嚟宣傳政策啫。不過，Jeff就話，個計劃的確增加咗佢生小朋友嘅意欲喎，認真唔話得。
其實生兒育女除咗供書教學，子女健康都令父母好費心，好似Jeff嘅囡囡近期唔係好舒服，有時瞓到半夜就會起身搵爸爸，搞到Jeff有時一晚瞓得四個鐘，朝早起身時真係無晒精神。雖然湊女辛苦，但Jeff坦言想生多個，不過都要睇太太意見喎。