政情：關注假難民 黃國健推薦睇東方
立法會內務委員會尋日開會，一班議員討論係咪喺內會轄下成立少數族裔權益事宜小組委員會。同意成立小組委員會的工聯會立法會議員黃國健（KK）就話，雖然工聯會轄下工會亦關注南亞裔難民權益，但唔可以同假難民混為一談，又話假難民問題已纏繞香港好長時間，更公開推薦︰「如果大家唔熟，我介紹大家睇《東方》，佢哋有好多報道。」
何啟明指黑工損基層生計
有議員喺尋日內會提出成立少數族裔權益事宜小組委員會，期間有議員提到本港南亞裔難民問題。KK就話，其所屬工聯會亦有協助少數族裔人士及關注南亞難民權益，但係本港現時有相當多假難民，造成黑工同社會治安等問題，連好多在港居住嘅少數族裔人士都反對假難民利用酷刑聲請嚟香港打黑工。
同屬工聯會嘅議員何啟明都批評部分南亞裔人士嚟香港打黑工，影響基層勞工生計。
工程界議員盧偉國認為，小組委員會應該只關注在港為合法居民嘅少數族裔權益。雖然議員持不同意見，但內會最後都通過成立該小組委員會。