政情：炮轟青政 陸頌雄「好牌唔識上」
新一屆立法會開鑼，一眾新丁議員首份功課係點樣打響頭炮。喺勞工界功能界別自動當選嘅陸頌雄（Michael）就主打愛國路線，喺周三宣誓儀式中戴上搶眼紅呔，以雄亮聲線宣讀誓詞，凸顯愛國形象。其後青年新政梁頌恆喺大會會議廳就宣誓問題發言時，Michael又企起身來罵同對峙，火藥味爆燈，再次成功出位。
到尋日召開內務委員會，Michael發言時話立法會宣誓等同結婚誓詞，佢對議員嘅承擔，同對老婆嘅諾言一樣咁堅定不移。同時佢不忘向青政游蕙禎同梁頌恆開火，狠批兩人喺宣誓期間將China讀成「支那」，係日本侵華嘅法西斯用語，全球包括西方國家都唔會有人採用，又搬出香港遭日治三年零八個月歷史，炮轟兩人言論傷害中港人民感情。
拒出席論壇單挑梁頌恆
短短兩日Michael已隱隱露出建制派重炮手嘅角色，但最近佢獲邀出席《城市論壇》，討論「立法會如何能維持有效運作」，同場嘉賓之一正是梁頌恆。不過，Michael拒絕出席論壇，原因係不屑同侮辱國家和不尊重議會嘅梁頌恆同台喎。其實Michael今次有機會喺鏡頭前「單挑」梁頌恆，大可乘勢繼續狙擊對方失言「搶分」，今次佢真係見到張好牌都唔識上。