政情：議員狂質死貓 立會秘書處反擊

秘書處日前將七十位議員宣誓嘅相片上載至立法會官方相簿，但秘書處就未有為所有議員留下最美好嘅一面，因為唔少議員喺相片中嘅神情相當古怪，好似民建聯張國鈞變咗矇豬眼、嘴嘟嘟，佢本人見到都大嘆：「乜咁渣■！」而工聯會麥美娟嘅相片都唔好得幾多，所以佢都話希望最好秘書處下次可以畀佢揀相，仲講笑話自己真人靚啲，但相片中反而變左「木嘴」喎。

游蕙禎反眼如貞子

至於當選立法會主席嘅梁君彥同財務委員會副主席田北辰嘅宣誓相片就合埋眼，但兩人冇眼睇都好過游蕙禎，因為佢神情最兇狠、大反白眼，再配合一把長髮，成個造型猶如一隻女鬼貞子，上載咁嘅相真係夠晒大整蠱囉，如果真係冇心，而係相片揀無可揀，咁就係立法會攝影師有問題喇。不過，秘書處咁搞法，就算受影響嘅建制派議員唔出聲，班本土派都肯定會當你有心玩嘢啦！

其實由選舉至今，本土派同秘書處牙齒印多到不得了，先有上載議員履歷到網站時，就將熱血公民鄭松泰嘅英文履歷中嘅Tuen Mun寫為Tuen Mum，屯門變「屯媽」。雖然秘書處於事後認衰，指係資料輸入錯誤所致，但其實另有說法係，所有資料由議員提供，只係議員無對清楚而令到秘書處食死貓。

本土議員頻頻挑機

而星期三進行嘅宣誓，亦都令到秘書處飽受壓力。三名非建制議員，分別係建築界姚松炎、青年新政梁頌恆及游蕙禎，都被秘書長陳維安裁定宣誓無效，搞到陳維安遭狂插，被狠批剝奪議員參與立法會主席選舉權利，做法不合乎慣例。至於主持主席選舉嘅梁耀忠又擺秘書處上枱，稱遭秘書處誤導，最終搞到秘書處忍無可忍，於前晚深夜向全體議員發聲明反擊，明確表示有向梁耀忠同埋石禮謙講解主持會議時嘅角色同埋權力。

到尋日舉行嘅內務委員會，非建制派議員依然死咬住秘書處唔放，秘書處喺短時間內承受到極大壓力，慘成為磨心。其實立法會議員宣誓唔係第一次，過去多屆宣誓相安無事，非建制派與其搞埋晒啲無聊宣誓，不如留待就任議員後正式決戰。