九龍城泰社區瀰漫哀傷

黑衣戴孝 難止淚水

泰王蒲眉蓬在位七十年以來一直凝聚着海內外泰國人的心，九龍城的泰國餐館及商店亦不例外，無一不懸掛泰王蒲眉蓬及王后詩麗吉的照片。蒲眉蓬離世後，區內瀰漫哀傷氣氛，不少泰國人紛紛換上黑色素衣戴孝。

「做咗七十年皇帝，好到冇得講！」居港廿三年的王女士一提到泰王就止不住淚水，形容自己痛失至親，更道出蒲眉蓬生前點滴：「佢會落村探訪，幾偏遠都去！冇衫着佢就搵人畀衫你；假如冇水咩，寫信畀佢，佢就會跟你去睇！」為了報答蒲眉蓬早年為她居住鄉村所作的無私援助，她更準備素衣戴孝一個月。

對於蒲眉蓬的離世，王坦言感意外：「睇電視，佢間唔中都會出嚟講嘢，估唔到咁快！」

購新電視 觀看移靈

昨午正值蒲眉蓬靈柩舁送大皇宮，所有泰國人都聚集在餐館及商店觀看直播。泰國人林小姐工作的餐廳前日電視壞掉，昨日即使要準備晚市，亦抽調人手急急購買新機以免錯失移靈儀式。林小姐稱對於泰王離世「個個都好唔開心！佢真係好好，幫窮人鋪路引水，（教百姓）種禾種穀！」她又稱會參與悼念集會，並到泰國領事館悼念蒲眉蓬。

泰國商店負責人吳女士說雖然來港卅年，但仍然難忘蒲眉蓬親民作風，「諗起就想喊，好唔捨得！不過八十幾歲，佢都好辛苦！」吳又稱王儲佛齊拉隆功是獨子，相信皇位繼承不會出亂子，寄望他繼承父親勤政愛民的作風。