中環出更：立會搞分享會 陸頌雄搣面解悶
剛卸任立法會主席嘅民建聯曾鈺成，尋日早上九點半應邀到立法會向新一屆立法會議員分享經驗，近三十名議員出席，可能係分享會舉行嘅時間太早，多個議員狂「打哈欠」。
周浩鼎不停「釣魚」
其中曾鈺成黨友周浩鼎更加於主席開講時不停「釣魚」，又一度於會議廳開餐食香蕉；立法會勞工界議員陸頌雄就不停用手搣面，更加雙手並用疑似搣暗瘡解悶。
曾鈺成尋日於分享會上講解行政立法關係、法案審議過程等資訊，唔知係咪一眾議員已經熟悉法案審議過程，期間周浩鼎不停「釣魚」，好在身旁黨友劉國勳不時同佢攀談幫佢「提神」。
不過要數最惹人注目嘅係工聯會議會新丁陸頌雄，佢不停搲身搲勢，更加雙手並用唔知係搣暗瘡定搣鬚根解悶，佢之後仲將搣咗嘅嘢放到鼻邊聞一聞，究竟陸頌雄係慣咗手勢，還是偶一為之，呢個只有佢自己至知嘞。
另外今次分享會一度出現有講有笑嘅一幕，話說曾鈺成提及議員出席會議衣着，當講到「身穿哲古華拉T-shirt嘅議員」時，當事人「長毛」梁國雄剛好到場，立即引來哄堂大笑。
卓妮