韓邵蔚冷艷動人

冷艷嘅女性有種拒人於千里之外嘅感覺,如果換成模特兒嘅話,卻予人一種神秘感,令人禁不住對佢產生好奇心。南韓人氣車模韓邵蔚正係人辦,外表如冰山冷艷,但骨子裏嘅佢係咪又同外表一樣呢?

玲瓏浮凸

今年26歲出生於南韓富川市嘅韓邵蔚,早喺2011年已經從事模特兒工作,當時嘅佢主要活躍於平面模特兒界,尤其係為各類型商品,包括婚紗、化妝品、美容等拍攝商業廣告,憑住玲瓏浮凸嘅身材以及冷艷氣質,喺模特兒界有相當人氣。可能有人覺得冷艷形象嘅模特兒有唔少,點解佢能夠喺眾多同類型模特兒之中脫穎而出呢?理由好簡單,就係佢冷艷中帶點萌味,性格活潑熱情,只係喺鏡頭下嘅佢卻恰好相反,眼神冷如劍,雖然笑容燦爛,卻予人莫名嘅距離感,呢種特別嘅感覺,營造出與別不同嘅獨特魅力。

出眾嘅外形及迷人嘅氣質,令佢獲得更多嘅工作機會,例如為汽車雜誌做車模嘅同時,又擔任南韓F1大獎賽網絡模特兒,同年以賽車女郎身份喺各類型嘅賽車比賽中亮相。自呢個時候開始,佢主力朝住賽車模特兒界出擊,更衝出南韓喺外國嘅車展中演出。

外冷內熱

成為賽車場上焦點嘅佢,開始涉足其他工作,先化身電玩展模特兒,喺G-STAR遊戲展中登場,又以遊艇模特兒身份現身遊艇展。隨住人氣不斷飆升,唔少人對佢嘅私生活愈嚟愈感興趣,而私底下嘅佢,卻唔似外表咁冷冰冰,反而相當熱情,熱衷同朋友相聚。雖然佢工作忙碌,甚至要到外國工作,但每當有時間,都會相約朋友聚會,更鍾意將聚會照片放上網同大家分享。據佢嘅朋友講,邵蔚不但活潑,更鍾意整古做怪,唔似鏡頭前咁Cool。此外,朋友更透露點解佢如此忙碌,卻又可以保持到滑溜嬌膚嘅秘密,原來佢按時瞓覺之餘,每晚臨瞓前,都會進食補品以補充營養。咁佢最愛邊種補品呢?答案就係高麗參。識得進補固然係佢保持皮膚質素嘅方法,只係講到保持體態嘅話,當然係努力做運動,尤其係跑步,佢認為對保持身材嘅效果最為顯著。

精彩推介

簡介:韓邵蔚擁有冷艷得令人心動嘅樣貌,加埋一副火辣身材,叫人點會唔對佢產生好感呢?想了解佢多啲,不妨花啲時間去佢嘅Instagram睇睇喇!

網址:https://www.instagram.com/hansoul2/

韓邵蔚Profile

出生地:富川

身高:172cm

三圍:34、24、34

撰文:魂