元朗新田邊境購物城開幕嘅消息由年頭聽到年尾，最初原定今年春節開張，及後順延至五一黃金周同八月暑假檔期，後來決定九二八開幕，項目倡議人黃定光（象哥）話呢個係擇出嚟嘅吉日，即使同佔中兩周年撞到應都無有怕。言猶在耳，象哥好快又證實購物城要延至聖誕節前先開到幕，仲話過去一、兩個月打大風落豪雨，搞到地盤地基同地下管道工程進度嚴重滯後先會推遲開幕喎。象哥今次將「個天都唔鍾意我」呢個理由都搬埋出嚟，萬一下次再延期，唔知又有咩新「原因」呢？
