政府推出低收入在職家庭津貼，原先預計有七十萬人受惠，點知成功申請嘅個案遠遜預期，有團體猛烈批評低津申請手續繁複，工時要求高同欠缺地區支援，令到申請人好困擾，怨聲載道，而勞工及福利局局長張建宗尋日就話已簡化申請表格，由原來八張變成六張，將喺十一月第二申請階段使用。低津嘅原意係幫人，但依家就變咗擾民，搞到申請「拍烏蠅」，張建宗難辭其咎，而最大嘅問題係嘈咗咁耐，張建宗先補鑊，好似順應要求咁簡化咗申請表格，但仲係要填六張咁多，有心簡化嘅就唔該做多啲喇！
