政情：民主阿婆 李漢奸又去唱衰香港
立法會選舉塵埃落定，本土自決派有七名人士入局，預料議會生態變得更激，而早幾日「搞事四人幫」就喺壹傳媒黎智英（漢奸黎）位於何文田嘅寓所聚會，未知係咪密謀攪局。尋日就收到消息，「搞事四人幫」當中，有「李漢奸」之稱嘅民主黨創黨主席李柱銘同「民主阿婆」前政務司司長陳方安生喺下個月飛去澳洲，喺悉尼大學演講，主講香港嘅未來同立法會選舉對香港嘅影響，當日仲係新一屆立法會開鑼翌日，莫非今次澳洲之行又乘機唱衰香港？
李漢奸同民主阿婆應澳洲Joint Standing Committee on Foreign Affairs, Defence and Trade（外交、國防和貿易聯合常務委員會）和Australia Institute of International Affairs,Victoria（AIIAV，澳洲國際事務研究協會維多利亞省分會）邀請，下月十號喺墨爾本AIIAV辦公室進行圓桌會議。內容係圍繞有本土派立法會候選人被拒入閘、多名佔領運動後衍生嘅年輕一代進入議會等新興現象，對香港政治舞台嘅影響。
去完墨爾本之後，李漢奸同民主阿婆就會「北上」去悉尼。佢哋應悉尼大學嘅Sydney Democracy Network（悉尼民主網絡）同埋當地嘅AIIA邀請，喺悉尼大學演講，主題係關於立法會選舉，仲會討論中國同英國有冇履行《中英聯合聲明》上嘅承諾。呢次演講咁啱就係新一屆立法會復會翌日，而多名本土自決派表明喺復會宣誓玩嘢，唔知李漢奸同民主阿婆會唔會又借題發揮？
前年去英國「自取其辱」
兩人以往多次到英國、加拿大及美國等地唱衰香港，而去澳洲則少之又少。李漢奸對上嗰次去澳洲已經係○三年嘅事，當時佢喺五十萬人上街反廿三條立法後去悉尼演講。至於民主阿婆，上次去澳洲已經係佢出任政務司司長嘅事，嗰次就係去澳洲推廣香港。
仲記得呢兩個「舊電池」喺前年孖住去英國，同當地官員見面及出席英國國會嘅外交事務委員會聽證會。不過，當時佢哋碰到一面灰，被英方「冷待」，未知今次去屬英聯邦嘅澳洲又會唔會再一次「自取其辱」呢？
黃之鋒應邀下月訪泰
此外，香港眾志秘書長黃之鋒喺下月都會出訪。今年適逢係泰國國立法政大學嘅學生運動四十周年，佢將喺下月六日應朱拉隆功大學邀請，參與當地嘅紀念活動。