中環出更：謀組新平台阿王捲土重來？
由香港島直選轉戰區議會（第二）功能界別，但最終未能連任嘅工聯會立法會議員王國興（阿王），任期只剩下不足半個月，佢尋日喺電台節目上透露，最近正醞釀成立一個新平台，監察政府同立法會，希望喺新一屆立法會議員宣誓前正式成立。唔通阿王想日後東山再起？
阿王話成立新平台嘅原因係要回報投佢一票嘅二十三萬選民，但暫未決定新平台係以乜嘢形式運作，甚至未知呢個平台係咪歸入工聯會名下。佢透露，平台嘅成員需要志同道合，但唔一定係工聯會嘅人。
反擊容海恩「小人得志」
至於早前容海恩曾批評工聯會「不合潮流」，其後阿王反擊指佢「小人得志，語無倫次」。阿王尋日再次寄語容海恩「勝之不驕，敗之不餒」，希望佢唔好驕傲。阿王亦引用「一將功成萬骨枯」，指容海恩勝出係靠其選舉團隊公民力量嘅區議員，喺新界東過去多年來地區工作嘅努力，先贏得議席。
卓妮