中環出更：慈善戲曲賣座 「殷」想粵劇溝莎劇
九龍樂善堂日前舉辦粵劇晚會《蝴蝶夫人》慈善特別場，吸引好多戲迷同城中名人捧場。見到咁受歡迎，樂善堂主席施家殷（Kyran）就話下次不妨諗吓有冇機會將莎士比亞名劇以粵劇形式演繹，兩種唔同文化衝擊，話唔定又可以擦出新火花。咁就真係好大膽嘅嘗試嘞！
話說呢套由意大利作曲家創作、以日本為故事背景嘅著名歌劇，今次以粵劇形式上演，雖然唔算係第一次，但都係一個相當受歡迎嘅劇目，一眾劇團演員更專登着上和服同水手裝等服飾亮相，另有一番風味。
梁紹安鍾情歌劇演唱會
講起每年都有好多慈善團體舉辦慈善粵劇或電影籌款，Kyran笑言每一次辦類似活動，通常合作單位都會有幾套唔同電影或戲寶畀佢哋選擇，而每次佢哋都要估吓邊套會最受歡迎，好考眼光（口架）！
卓妮見到連協成行集團董事總經理方文雄、健康快車創會主席方黃吉雯同香港理工大學校長唐偉章、樂善堂副主席楊小玲及司庫梁紹安都有嚟捧場。原來楊小玲都係戲迷，不時都會孖老公一齊睇粵劇，而梁紹安則鍾情歌劇同演唱會。
另外，Kyran仲帶埋一班重量級常務總理加入樂善堂兼落力支持活動，包括盈健主席陳健平、珠寶品牌主席張寬年、經營嬰兒用品嘅蘇裕康及律師李勁冲等。咁多老友幫手，Kyran話籌得嘅善款除會用喺改善固有教育、醫療及安老服務外，仲會用喺今年開辦嘅中醫診所、言語治療中心同牙科診所等。
卓妮