財爺鬍鬚曾尋日喺網誌總結哈薩克外訪行程，話香港同哈薩克一樣，都有潛質成為「一帶一路」戰略嘅關鍵節點喎。呢啲咪吹水唔抹嘴囉，香港家陣七國咁亂，自身難保，累少陣街坊已經偷笑，仲講話幫助國家發展，盞笑大人個口嘅咋！
第樣唔講，就講港珠澳大橋。內地段工程固然進展順利，捷報頻傳，澳門段之前雖然稍有阻滯，但亦好快克服，相信如期通車唔成問題，唯獨香港段問題多多，進度嚴重滯後，甚至連作為核心工程之一嘅香港口岸人工島都仲係一笪爛地，幾乎肯定無法如期明年通車。一條大橋兩種進度，搞到粵澳通車要「等埋香港」，港產官僚如果仲有啲羞恥心，都好搵窿捐喇。
話時話，港珠澳大橋好事多磨，多災多難，只係大型基建工程亂象嘅冰山一角。大家有眼見，無論高鐵又好，西九文化區都好，幾乎冇一樣唔係延誤復延誤，超支復超支。正如「東方報業民意調查」顯示，大部分受訪者狠批大型基建甩漏多多，嚴重削弱本港競爭力，損害國際城市形象，令香港淪為笑柄。
講真，港府施政一塌糊塗，又點止大型基建拖拖拉拉咁簡單吖。好似橫洲公營房屋發展計劃大縮水呢單醜聞咁吖，搞到滿城風雨，媒體愈揭愈多疑點，官府就例牌唧牙膏式回應，結果愈描愈黑，都唔知點收科。
最離譜嘅係，港府大事做唔到，小事一樣搞到一鑊泡。康文署救生員請假本應有規有矩，點知署方闊佬懶理，放任自流，救生員請假連醫生紙都唔使出示，結果有人六年請病假五百幾日，有人兩個月唔返工，甚至有工會頭頭「病假」期間走去佔領，搞到公眾泳池三日唔埋兩日要被迫關門，市民真係多得佢哋唔少。
除咗康文署救生員無王管，港府另一單「賴嘢無下限」嘅典型例子，係房署大拿拿斥資五億公帑為公屋住戶更換三支香晾衫架，結果因為設計出問題，搞到要再花近四億元填氹補鑊。安裝晾衫架之嘛，又唔係乜嘢高科技、高難度項目，咁都搞到唔湯唔水，你話啲官僚係咪食塞米，呢個政府係咪廢到爆吖。上述民調顯示，大部分受訪者批評冇神經政府樣樣唔掂，絕對唔係無的放矢。
諗起真係唏噓，今屆政府上台之初躊躇滿志，又話「適度有為」，又話「穩中求變」，一度令人有所期待，點知四年過去，施政寸步難行，出醜多過食飯，「適度有為」變成「極度無能」，「穩中求變」淪為「添煩添亂」，咁就難怪社會紛紛擾擾，怨氣沖天，有條件嘅人都爭住移民喇！