曾經被民調看好的美國民主黨總統候選人希拉妮，因健康問題令共和黨特朗普的支持度有回升迹象。其實特朗普比六十八歲的希拉妮還要大兩歲，其健康狀況一樣令人存疑，難怪美國大選被形容為存在「危機」或相當的「風險」。
事實上，美國選民對這兩個候選人都有所不滿，如何投票確實煞費思量。「大嘴巴」若然因希拉妮的健康問題而得益，對環球經濟市場帶來的震盪應是巨大的。早前特朗普接受採訪時便大放厥詞，稱中方如果解決不了北韓核試所引發的一系列問題，美國應讓中國在出口貿易上吃苦頭，「我的意思是，只要提高進口關稅或者中斷貿易，中國在兩分鐘之內就會崩潰」。美國欠落周身債，對住大債主講呢啲，你話係唔係笑甩人棚牙？莊子話齋：水之積也不厚，則其負大舟也無力。自己冇水又點會有力托起大船呢？美國即使是夜行人吹口哨，要壯膽都要靠譜至得o架！
其實美國人真係唔算富有。為了模擬美國消費者的財務經濟狀況，美聯儲曾做了一項調查，結果令人大跌眼鏡，竟然有百分之四十七受訪者表示拿不出四百美元應急資金。研究稱，美國人得到一筆錢，譬如獎金、退稅、遺產等，佢哋唔會諗住儲蓄，而係傾向消費。另一項數據顯示，百分之五十五美國家庭攞唔出足夠嘅流動資金來應對一個月工資嘅損失，幾乎有一半美國成年人生活在財困邊緣。
有個講法係，對大多數美國中產而言，可能聽到身邊的人說在用壯陽藥，但很少聽到有人說自己收入「好唔掂」，存在債務危機。論者嘆曰，承認自己經濟唔掂比承認自己性無能更尷尬。還有研究指美國中年白人的死亡率上升，主要是毒品和酒精中毒，這未知是否與窮有關？「大嘴巴」靠吹，口水多過浪花，欲挽美國經濟狂瀾於既倒，不如實際啲從穿膠花做起。